Ilang araw na lang at Pasko na. Siguradong ginugunita na naman ng mga taga Cavinti ang mga bagay na kaakibat ng Pasko. Muli na namang mapapasaisipan nila ang mga kasiyahan na hatid nito. Para sa mga bata, iniisip nila ang pamamasko sa mga ninong at ninang, tiya’t tiyo at iba pang mga kamag-anak upang makatanggap ng mga aguinaldo. At hinahanap-hanap na ng mga dalaga at binata ang pagsasama-sama ng magkakabarkada sa pamamasyal at iba pang mga kasayahan. Ang mga tatay at nanay at iba pang mga
matatanda naman ay abala sa paghahanda ng mga pambilli ng mga pangregalo at pagkain para sa noche buena at pagkain sa araw ng Pasko at media noche kung Bagong Taon.
Mamayang madaling araw ay magsisimula na ang “simbang gabi.” Maraming mga tao ang gigising nang maaga upang sumimba. Pagkatapos ng misa, marami ang mag-aalmusal ng arroz caldo, puto bumbong, bibingka, puto o sumang latík at mainit na kape o tsokolate sa mga magtitinda sa patio ng simbahan at sa mga tabing kalsada.
Pagsapit ng gabi, mananapatan naman sa bawat bahay ay ang mga magkakaroling. At ang gawing ito ay gabi-gabi hanggang Bagong Taon. Ang bawat may bahay ay magbibigay ng pera, magpapakape o magpapainom. Kung hindi, ang mga bata ay may nakahandang awit na ganito: “Tenkyo, tenkyo, tenkyo; ang kukuriput ninyo. Tenkyo.”
At ang mga pagdiriwang na ito ay hanggang sa unang Linggo ng bagong taon, ang Pagdalaw ng Tatlong Hari.
Kayo na ang humatol. Masaya ba ang Pasko sa Cavinti?
Siyempre naman masaya ang Pasko sa Cavinti.
Nais ko lang ipaalam sa inyo na dito sa amin sa Union City, California at sa katabi naming city tulad ng Hayward at Fremont, mayroon din Simbang Gabi na ginaganap sa madaling araw ika lima at kalahati (5:30) ng umaga. Maginaw sa oras na iyon pero napakaraming sumisimba at sa bawa’t araw ay ibang Paring Katoliko ang nagmimisa. Pagkatapos naman ng misa ay may libre almusal, donasyon ng mga negosyanteng Filipino karamihan ay may ari ng restaurant at bakery.
Masasarap ang handa nila.
Sa ibang city naman tulad sa Los Angeles, gabi nila ginagawa ang misa.
Ang Simbang Gabi namin a dinadaluhan na rin nang kahit non-Filipinos, tulad ng mga Vietnamese, Espanol, Indians, French, Italians at iba pa. Itong magandang tradisyon nating ito ang malaking ambag natin dito sa U.S. para sa paghahanda sa pagsilang ng ating Panginoon.
Hi,
tipakan.com – da best. Keep it going!